Ndërsa Kombëtarja shqiptare U-21 e volejbollit femra nuk arriti të mposht Turqinë në Kampionatit Ballkanik (0-3), një emër spikati me forcë dhe talent të rrallë: Irsa Metanji.
Vajza 17-vjeçare nga Korça, pjesë e ekipit të Skënderbeut, realizoi 21 pikë, duke qenë lojtarja më e mirë e ndeshjes, pavarësisht rezultatit përfundimtar.
Me një performancë që tregoi maturi, vendosmëri dhe talent të pastër, Metanji u konfirmua si një nga zbulimet më premtuese të këtij kampionati ballkanik.
Në kampin korçar, ka bindje se pozicioni 4 tashmë ka një emër të padiskutueshëm.
Në prag të sezonit të ri, drejtuesit dhe trajnerët e Skënderbeut besojnë se ky do të jetë sezoni i Metanjit, jo vetëm për zhvillimin e saj personal, por edhe për të ndihmuar ekipin në objektivat kombëtarë.
Në një periudhë ku volejbolli shqiptar ka nevojë për emra të rinj dhe të guximshëm, Irsa Metanji po shndërrohet në një histori suksesi të vërtetë – një vajzë që me 17 vite mbi supe, tashmë po shkëlqen në arenën ballkanike.
