Drejtoria Vendore e Kufirit dhe Migracionit Korçë ka intensifikuar kontrollet në PKK Kapshticë dhe përgjatë kufirit të gjelbër, me qëllim parandalimin e lëvizjes në kundërshtim me ligjin dhe goditjen e krimeve ndërkufitare. Gjatë këtyre verifikimeve, shërbimet e Policisë Kufitare kanë bërë të mundur kapjen dhe arrestimin e një shtetasi të shpallur në kërkim.
Në hyrje për në Shqipëri, efektivët ndaluan P. N., 36 vjeç, banues në Elbasan, ndaj të cilit Gjykata e Durrësit kishte caktuar masën e sigurisë “Arrest në burg”, për veprat penale “Dëshmi e rremë” dhe “Futja e sendeve të palejuara në IEVP”. Sipas Policisë, 36-vjeçari po tentonte të kalonte kufirin në kundërshtim me ligjin.
Pas arrestimit, materialet e mëtejshme procedurale u referuan pranë DVP Elbasan, për vijimin e hetimeve sipas kompetencës.
