Prej 50 vitesh zëri melodioz i Spanja Pipës ka kënduar këngët urbane korçare me një pasion të pashuar. Pipa gjithashtu vlerësohet si ndër të paktët zëra femëror që kënduan serenatat korçare, këngë dashurie zakonisht të kënduara prej meshkujve.
Muzikologia Mikaela Minga dhe etnomuzikologu Nicola Scaldaferri thanë për Kolibri.al se që nga takimi i parë figura e Spanja Pipës i intrigoi për botimin e një libri dhe regjistrimin e këngëve.
“Është një personazh shumë karizmatik, është një artiste shumëformëshe, shumëplanëshe. Tek ajo bashkohet elementi i aktores dhe i këngëtares; ka një përvojë skenike që ndihet menjëherë dhe arrin të ta transmetojë kudo që të jetë,” tha Minga.
Kolegu i saj Scaldaferri mbart të njëjtat emocione kur flet për Pipën.
“Një zë shumë i bukur, më bëri një përshtypje shumë të madhe herën; e parë që e kam takuar Spanjën, ishim në Korçë me Mikaelën, e dëgjova që këndoi dhe… thamë do të bëjmë diçka sepse ishte një zë i jashtëzakonshëm”, tha Scaldaferri, i cili është me origjinë arbëresh.
E pyetur ekskluzivisht nga Kolibri.al, edhe pse në moshë shumë të thyer Spanja Pipa tregon se muzika e ka lënë pa martuar, pasi njerëzit e gjykonin, teksa ajo ishte ndër të rralla vajza që këndonte pa turp serenatën.
Ende dhe sot me plot fuqi për këngën korçare, Spanja tregon se do të vazhdojë të këndojë deri sa të ketë frymë e zë, pasi sipas saj, fuqia që serenata jep është e pashtershme
