Në mbledhjen e zhvilluar këtë të enjte, Këshilli Bashkiak i Korçës miratoi dhënien e ndihmës ekonomike për muajin dhjetor 2024. Nga fondi i kushtëzuar për bllok-ndihmën ekonomike, përfituan gjithsej 45 familje, ndërsa nga fondi i buxhetit vendor përfituan 26 familje.
Po ashtu, janë miratuar kriteret për familjet në nevojë që do të trajtohen me ndihmë ekonomike nga fondi i buxhetit vendor për vitin 2025. Përfitues do të jenë ato familje që nuk kanë përfituar nga sistemi i pikëzimit, por kualifikohen për shkak të kushteve të vështira social-ekonomike dhe vështirësive të veçanta sociale.
Gjithashtu, janë miratuar edhe kriteret për ndihmën ekonomike nga fondi i kushtëzuar për bllok-ndihmën ekonomike për vitin 2025. Drejtoria e Kujdesit Social do të përzgjedhë familje nga kategoritë më në nevojë për këtë ndihmë.
Në mbledhje u diskutua dhe u miratua strategjia vendore për zvogëlimin e riskut nga fatkeqësitë dhe plani i veprimit për vitet 2025-2030. Ky plan ka për qëllim drejtimin e aktiviteteve dhe investimeve të ardhshme, si dhe menaxhimin e riskut nga fatkeqësitë në një mënyrë tërësore dhe gjithpërfshirëse, duke përfshirë edhe fondet e akorduara nga bashkia, qeveria shqiptare dhe donatorë të tjerë.
