MË THUAJ SI I TRAJTON NJERËZIT ME AFTËSI TË KUFIZUARA TË TË THEM Ç’JE!
Mund t’ju ftoj për diçka?
Le ta shndërrojmë energjinë pezmatuese të realitetit të hidhur në buzëqeshje të përligjur, duke marrë përgjegjësi, për të kontribuar me ide dhe veprime, në dobi dhe përmirësim të gjësë. Sepse ka buzëqeshje si Diell, si Hënë dhe si Afërditë, por ndoshta nuk ka buzëqeshje më të bukur se ajo e njerëzve me Aftësi Ndryshe.
Falë gazetarit korçar Xhensil Shkëmbi po na pasqyrohet sot me foto, një mjet transporti i padenjë për bashkëqytetarët tanë në fjalë. Ndofta edhe Dielli dora vetë, po ta shihte, do ngrinte do bëhej akull, sidomos, pasi ky rast na kujton se është vetëm njëra nga majat e ajzbergut të mbarëvajtjes sonë sociale.
Le të mos trembemi nga këto maja ajsbergësh. Le të mos fshihemi prapa gishtit sikur të mos ekzistonin. Përkundrazi, le të jemi vigjilentë e të vëmendshëm, t’i kemi busulla udhërrëfyese të udhëtimit tonë: ky lundrim, nuk ka se sí të mos jetë i gjatë, e i mundimshëm.
Amá, na takon ne zgjedhja, t’u japim duarve formën e lopatave kah Harmonisë dhe Buzëqeshjes, ose t’i kthejmë në vegla, për ta shtyrë tëposhtë fundit të detit, Titanikun e të përbashkëtës, për të cilën Historia na mëson se fundoset kur nuk bëzajmë, e kur nuk marrim përgjegjësi.
Individualisht, mund të ndihemi një pikë e oqeanit, por ndërgjegjja jonë kolektive është oqeani që nuk do kishte kuptim dhe do ishte i paplotë, pa ndërgjegjjen individuale, do thoshte Nënë Tereza.
Veprimet dhe mosveprimet individuale ditore, pra, janë burimi që basenin e të Përbashkëtës e kthen në ujëra fekalesh, në qelibar si deti Jon, apo në ujëra të ndërmjetme.
Kur institucionet janë në këtë derexhè, e bëjnë 1 të mirë, sepse janë si plehu që ushqen bimën e re; kësi ndërgjegjjesh kanë fuqinë të kthehen në lakmuesin, që na flet troç e na thotë, se kur kapet fundi i detit, të mbetet t’u japësh këmbëve të dalësh në dritë.
Kam shumë besim se dimë dhe duam të notojmë në ujëra të pastra!
Jam plot besim se dimë dhe duam të dalim në dritë!
Le ta bëjmë për muzé këtë furgon!
(c) L.P. 04/09/2023
