Edicioni i 12-të i Festivalit Mbarëkombëtar të Komedisë “KoKo Fest” u mbyll mbrëmjen e djeshme në Korçë me një atmosferë festive arti, humori dhe emocionesh të forta. Shfaqja “Vendi më i humbur në Shqipëri” nga Teatri “Aleksandër Moisiu” i Durrësit u shpall triumfatore e këtij edicioni, duke rrëmbyer pesë çmime kryesore: shfaqja më e mirë, regjia më e mirë për Andia Xhungën, aktori protagonist më i mirë për Gentian Zenelajn, aktori i ri më i mirë për Aleks Seitaj, si dhe çmimin e publikut.
Mbrëmja përmbyllëse u pasurua edhe me një ekspozitë karikaturash të artistit Ardi Karanxha, ndërsa fundi artistik i festivalit u vulos me shfaqjen “Komedia e Zezë” të Teatrit “Bekim Fehmiu” nga Prizreni.
Në mesin e fituesve të këtij viti u nderuan edhe emra të tjerë të rëndësishëm të skenës, si Gëzim Kame me çmimin e karrierës, Zamira Kita, Olta Daku dhe Egla Ceno për aktoret më të mira protagoniste, Ylber Bardhi si aktori më i mirë joprotagonist dhe Liridona Bytyqi si aktorja më e mirë joprotagoniste. Gjithashtu, u veçuan me çmime Endri Çela si artist i ri më i mirë, Sofia Kara për kostumografinë, Beqo Nanaj për skenografinë, ndërsa shfaqja “Zullulandia” mori çmimin “FresKOKO”.
Edicioni i këtij viti konfirmoi edhe një herë se Korça mbetet kryeqyteti i humorit dhe komedisë, duke bashkuar në skenë trupa teatrale nga Shqipëria dhe rajoni, si dhe një publik të zjarrtë që e shndërroi festivalin në një ngjarje të paharrueshme.
