Kompozitori i njohur kosovar Trimor Dhomi për herë të dytë sjell në skenën e teatrit “Andon Zako Çajupi” të Korçës një koncert acapella, duke befasuar artdashësit e shumtë të këtij qyteti të pranishëm në këtë sallë.
Befasues ky koncert ka qenë edhe për turistët të cilët kishin zgjedhur Korçën për të kaluar festat e fundvitit.
Kosovari i njohur ja ka dalë të përballojë një koncert krejt të veçantë për më shumë se 60 minuta me nxënës të shkollës së mesme “Tefta Tashko Koço” duke i gërshetuar me zërat e vjetër të Korit Lira.
Befasia me e mëdha ka qenë finalja e këtij koncerti me këngën e njohur shkodrane “Si Dukat i Vogël je” të cilën e ka sjellë në origjinalitet të interpretuar me zëra të shumtë, ashtu siç ka sjellë kështu dhe këngët e njohura korçare.
Për këngëtarin e njohur korçar Tomi Kondakçi ky koncert ka treguar se krijuesit duhet të besojnë më shumë tek nxënësit e shkollës së muzikës së këtij qyteti, edhe për t’i rikthyer lavdinë e dikurshme.
Këngëtarja e re Flavia Zere nuk e ka fshehur emocionin që i ka falur ky koncert pasi e për të ka qenë një përvojë e re që do t’i shërbejë më se shumti në karrierën e saj artistike.
Kompozitori dhe dirigjenti kosovar Trimor Dhomi për herë të dytë ka guxuar të “trazojë” në Korçë mjeshtërisht serenatën dhe këngët qytetare korçare, të cilat janë interpretuar nga këngëtarë të rinj e të vjetër të kësaj muzike
