Korça, qyteti i serenatave, do të jetë skena e një eventi të veçantë për dy netë me radhë, më 27 dhe 28 shtator. Ky festival, i cili feston traditën shumëvjeçare të serenatave korçare, do të sjellë një atmosferë unike për qytetarët dhe vizitorët e shumtë që adhurojnë këto këngë shpirtërore.
Serenatat, të cilat kanë shoqëruar breza të tërë me meloditë e tyre plot ndjenja si dashuri, gëzim, dhimbje dhe hidhërim, do të rikthehen në jetë përmes performancave të artistëve më të njohur të qytetit. Rrugët e Korçës dhe Pazari i Vjetër do të mbushen me tingujt e ëmbël të kitarave, mandolinave dhe violinave, duke i dhënë qytetit një atmosferë të jashtëzakonshme.
Eventi nisi mbrëmjen e 27 shtatorit në orën 18:00 me performancat “Tingujt e Rrugicave” në Muzeun Arkeologjik, ku do të interpretojnë Harmonia Band, Jorgjeta Lalazi & Band dhe Cofiel Band. Më pas, Pazari i Vjetër do të jetë qendra e performancës së njohur të vëllezërve Endri dhe Stefi Prifti.
Mbrëmja e dytë, më 28 shtator, do të jetë një tjetër spektakël, ku 13 këngëtarë dhe Kori Lira do të ngrejnë peshë qytetin me serenatat e tyre deri në orët e vona të natës.
