Sot, në Athinë, Ambasada e Republikës së Shqipërisë në Greqi organizoi me sukses aktivitetin e dytë në kuadër të ciklit “Shqipëria Ime”, një nismë që synon të forcojë lidhjet mes komunitetit shqiptar në Greqi dhe të promovojë pasuritë kulturore dhe historike të vendit tonë. Kjo ngjarje tërhoqi një numër të madh pjesëmarrësish, ku shqiptarët e ardhur nga qytete të ndryshme të Greqisë, dhe veçanërisht korçarët, festuan së bashku traditat dhe trashëgiminë e pasur që i lidh me atdheun.
Në qendër të këtij aktiviteti u vu qyteti i Korçës, i njohur për historinë dhe mikpritjen e tij, duke bërë që pjesëmarrësit të përjetojnë emocione të veçanta për rrënjët e tyre kulturore. Eventi u organizua me mbështetjen e Ministrisë për Evropën dhe Punët e Jashtme të Shqipërisë dhe solli aktivitete të shumta kulturore që rikthyen traditat shqiptare, duke forcuar ndjenjën e përkatësisë dhe unitetit mes komunitetit shqiptar në diasporë.
Këtë aktivitet nderuan me prezencën e tyre Kryetari i Bashkisë së Korçës, z. Sotiraq Filo, znj. Zamira Kita, Drejtoreshë e Teatrit të Korçës, shkrimtarja dhe kryetarja e shoqatës kulturore “Korça” në Greqi, znj. Elona Gjergo Tanka si dhe anëtarë të shoqatës, kompozitori i mirënjohur, z. Sparzak Tilo, diplomatë të Ambasadës Athinë, miq dhe dashamirës të kulturës korçare.
Aktiviteti u mbyll me një program artistiko-kulturor dhe degustimin e produkteve dhe ushqimeve tradicionale korçare.
Foto galeri
