Korça po jeton një tjetër fundvit me ritme të larta turistike, duke u renditur ndër destinacionet më të kërkuara për festën e ndërrimit të viteve. Qyteti juglindor ka tërhequr vizitorë nga e gjithë Shqipëria dhe nga jashtë saj, falë atmosferës së veçantë festive, shesheve dhe rrugëve të ndriçuara, si edhe traditës së pasur kulinare.
Gatimet tipike korçare, pijet tradicionale dhe mikpritja karakteristike e zonës kanë qenë faktorë kyç në rritjen e interesit turistik. Si rrjedhojë, kapacitetet akomoduese janë shfrytëzuar maksimalisht, me hotele dhe bujtina që raportojnë rezervime të plota për natën e fundvitit.
Fluksi i lartë i vizitorëve vërehet gjithashtu edhe në pikat kufitare dhe në akset kryesore hyrëse drejt qytetit, duke konfirmuar edhe një herë Korçën si një nga zgjedhjet kryesore për festat e fundvitit.
