Në Korçë ka startuar edicioni i 14-të i kampionatit ndërkombëtar të fluturimeve “Korça Open Air”, një ngjarje sportive që ka sjellë në qytet mbi 50 pilotë nga Shqipëria, Kosova dhe vende të tjera të Europës.
Këtë vit, aktiviteti zhvillohet nën emrin e Trofeut “EXTRA SKËNDERBE”, me synimin për të promovuar sportet ajrore, turizmin malor dhe bukuritë natyrore të zonës përmes fluturimeve të lira, me paramotorë dhe demonstrimeve nga toka.
Drejtori i Përgjithshëm i “Korça Open Air”, Alket Islami, theksoi se Korça është tashmë një pikë referimi për sportet ajrore në rajon:
“Ky aktivitet është një ndër më të rëndësishmit në vend, sepse bashkon sportin me turizmin dhe aventurën. Çdo vit rritet interesi dhe niveli i garave, duke e bërë Korçën një destinacion të veçantë për sportet ajrore.”
Fluturimet dhe garat po zhvillohen në Fushën e Aviacionit në Lumalas, ku pilotët konkurrojnë në disiplinën e precizionit të uljes dhe në kategori të ndryshme fluturimi.
Ngjarja shoqërohet me një atmosferë festive, muzikë dhe argëtim për publikun, ndërsa për të gjithë adhuruesit e sporteve ajrore, “Korça Open Air” do të transmetohet drejtpërdrejt në RTSH, duke sjellë pamje spektakolare të qiellit korçar.
