Sezoni veror po troket me shifra premtuese për turizmin në Korçë, ku thuajse të gjitha prenotimet janë mbyllur, duke reflektuar një interes të shtuar nga vizitorët vendas dhe të huaj.
Operatorët turistikë raportojnë se rezervimet kanë nisur që shumë muaj më parë, madje që nga viti i kaluar, dhe përfshijnë turistë nga vende të ndryshme të Ballkanit dhe Europës, çka e pozicionon Korçën si një destinacion gjithnjë e më të preferuar në hartën turistike të Shqipërisë.
Pavarësisht se kapacitetet akomoduese konsiderohen të mjaftueshme për të përballuar këtë fluks, sfida më e madhe për bizneset e turizmit mbetet rritja e standardit të shërbimeve, për të garantuar një përvojë të denjë dhe për të forcuar imazhin e qytetit si një destinacion cilësor.
Korça po shfaqet çdo sezon me potencial të lartë zhvillimi, duke krijuar më shumë mundësi për ekonominë lokale dhe duke e shndërruar turizmin në një motor të rëndësishëm të tij.
