Në Korçë ka nisur edicioni i dytë i festivalit “Korça Serenights”, i cili për tre netë me radhë do t’i dhurojë publikut magjinë e serenatave. Nata e parë u çel në Pazarin e Vjetër, ku grupi Laxarela Band ngjalli emocion me interpretimin e disa prej këngëve më të dashura të këtij zhanri muzikor.
Festivali do të vijojë sonte në ambientet e Liceut, me performancat e Mimoza Paravelit, Ëndërr Serenatë Band, Jorgjeta Lalazit dhe bandit “Hani i Pazarit”, ndërsa mbrëmja do të mbyllet me ritmet e Cofiel Band.
Kulmi i eventit pritet të jetë nata e tretë, kur Pazari i Vjetër do të kthehet në një skenë gala. Koncerti final do të hapet nga Orkestra Simfonike e Forcave të Armatosura, ndërsa më pas do të interpretojnë emra të njohur të muzikës shqiptare si Frederik Ndoci, Eli Fara, Endri dhe Stefi Prifti, Mihallaq Andrea, Ermira Kola dhe Bledi Polena.
Ky festival zhvillohet nën drejtimin artistik të Mjeshtrit të Madh Josif Minga dhe kurimin e Blerta Belliut, duke sjellë një kombinim të traditës me risi që e bëjnë Korçën për tri netë me radhë kryeqytetin e serenatës.
