Drejtoria Vendore e Policisë Korçë ka raportuar për një sërë ngjarjesh të ndodhura në qark gjatë 24 orëve të fundit, që kanë sjellë arrestime, procedime penale dhe denoncime nga qytetarët.
Një 21-vjeçar nga Korça, me inicialet M. D., u arrestua në flagrancë nga specialistët e qarkullimit rrugor, pasi u kap duke drejtuar automjetin në gjendje të dehur.
Ndërkohë, janë regjistruar edhe dy aksidente rrugore. Në fshatin Borovë, Ersekë, një 30-vjeçar banues në Spanjë humbi kontrollin e motomjetit që drejtonte dhe pësoi lëndime të lehta. Po ashtu, në Pogradec, një automjet i drejtuar nga shtetasi E. D., 35 vjeç, u përplas me një monopatinë që drejtohej nga një 20-vjeçar, i cili mbeti lehtë i dëmtuar.
Në Maliq, policia ka proceduar penalisht shtetasin K. D., pasi u kap duke kryer punime ndërtimi pa leje, ndërsa në Korçë, një 31-vjeçar u ndalua pasi gjatë kontrollit fizik iu gjet një sasi e dyshuar lënde narkotike kokainë.
Specialistët për Hetimin e Krimeve Ekonomike kanë proceduar penalisht edhe një 58-vjeçar nga Drenova, i cili dyshohet se administronte një lokal të paregjistruar në organet tatimore.
Në Komisariatin e Policisë Korçë është denoncuar largimi nga banesa i një vajze 13-vjeçare nga e ëma e saj, ndërsa në Ersekë, një 67-vjeçar ka kallëzuar vjedhjen e kasafortës së tyrbes në fshatin Gjonç.
Gjithashtu, tre persona – një nga Berati, një nga Elbasani dhe një nga Gjirokastra – janë proceduar penalisht për veprën penale “Kalimi i paligjshëm i kufirit shtetëror”.
Policia e Korçës bën me dije se materialet për të gjitha rastet janë referuar në Prokurori për veprime të mëtejshme.
