Drejtoria Vendore e Policisë Korçë informon se gjatë 24 orëve të fundit janë zhvilluar disa operacione dhe kontrolle, me qëllim parandalimin dhe goditjen e veprimtarive të paligjshme në territorin e qarkut.
Në Korçë, specialistët e Sektorit të Qarkullimit Rrugor arrestuan në flagrancë M. Sh., 20 vjeç, pasi u kap duke drejtuar automjetin pa leje drejtimi.
Po në Korçë, u arrestua E. L., 34 vjeç, i cili kishte thyer masën e sigurisë “Arrest në shtëpi”, të caktuar nga Gjykata e Korçës.
Gjithashtu, nisi procedimi penal ndaj V. S., pasi u kap duke kryer punime ndërtimi pa leje.
Në Pogradec, filloi procedimi penal ndaj M. H., 18 vjeç, nga fshati Leshnicë, i dyshuar për konflikt fizik me dy bashkëmoshatarë, për motive të dobëta.
Po në këtë zonë, më datë 09.10.2025, në fshatin Çërravë, dyshohet se si pasojë e një shkëndije elektrike ka rënë zjarr në një stallë bagëtish në pronësi të O. K., 40 vjeç, ku u dogjën 170 krerë bagëti të imëta.
Në Maliq, nisi procedimi penal ndaj E. S., 39 vjeç, i cili dyshohet se ka përvetësuar disa bagëti të imëta, nëpërmjet mashtrimit, një 44-vjeçari.
Gjithashtu, u shpall në kërkim O. A., 49 vjeç, nga Liboniku, pasi dyshohet se i ka vjedhur disa shpendë një 72-vjeçari.
Në Tiranë, u shpall në kërkim E. T., 46 vjeç, i cili dyshohet se ka marrë me mashtrim tre celularë, nga një 40-vjeçar i punësuar në një servis celularësh në Korçë.
Ndërkohë, në lidhje me largimin e një 15-vjeçareje nga banesa në datën 04.10.2025, kjo shtetase është paraqitur vetë në Komisariatin e Policisë, duke deklaruar se ishte larguar me dëshirën e saj. Po vijojnë veprimet për sqarimin e plotë të rastit.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
