Drejtoria Vendore e Policisë Korçë ka bërë me dije një sërë veprimesh policore dhe procedime penale të ndodhura në ditët e fundit në qytetet e qarkut.
Shërbimet e Komisariatit të Policisë Korçë arrestuan në flagrancë 26-vjeçarin B. H., banues në Korçë, i cili kishte kallëzuar se ishte goditur nga një person i panjohur. Nga hetimet rezultoi se i riu ishte vetëdëmtuar në dorë me thikë, duke dhënë deklarime të rreme. Po në Korçë, nisi procedimi penal për shtetasin E. N., 40 vjeç, pasi gjatë kontrollit në automjetin e tij u gjet një mjet prerës (thikë), i cili u sekuestrua si provë materiale.
Në Pogradec, nisi procedimi penal për dy shtetas: L. D., 51 vjeç, i dyshuar se ka goditur me grushte një 60-vjeçar për motive të dobëta, dhe O. Xh., 39 vjeç, i cili u kap afër banesës së të njëjtit shtetas me një shkop bejsbolli.
Ndërkohë, në Maliq, nisi procedimi penal për shtetasin I. S., 36 vjeç, banues në fshatin Libonik, i dyshuar për vjedhjen e disa produkteve bimore dhe një pajisjeje pune të një 69-vjeçari, si dhe për shtetasin K. G., 24 vjeç, nga fshati Pocestë, i dyshuar për përndjekje ndaj një 17-vjeçareje.
Specialistët e Sektorit të Qarkullimit Rrugor referuan materialet në Prokurori edhe për shtetasin R. K., 57 vjeç, nga Prrenjasi, pasi në aksin rrugor “Pogradec-Qafë Thanë” automjeti që drejtonte u përplas me një tjetër mjet, duke shkaktuar dëmtimin e lehtë të një pasagjereje.
Policia bën me dije se materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
