Drejtoria Vendore e Policisë Korçë ka zhvilluar një sërë veprimesh gjatë 24 orëve të fundit, duke finalizuar disa raste në fushën e narkotikëve dhe sigurisë në punë, si dhe duke hetuar dy ngjarje me humbje jete.
Arrestime për narkotikë
Specialistët e Sektorit për Hetimin e Narkotikëve arrestuan në flagrancë shtetasin S. D., 24 vjeç, banues në Korçë, pasi gjatë kontrollit fizik iu gjet një sasi lënde e dyshuar narkotike kokainë, e cila u sekuestrua si provë materiale.
Po ashtu, u arrestua N. T., 20 vjeç, dhe u referuan materialet në Prokurori për një 17-vjeçar, pasi gjatë kontrollit nga Forca e Posaçme “Shqiponja”, në lagjen nr. 14 të qytetit, iu gjetën sasi lëndësh të dyshuara narkotike kanabis.
Procedime për shkelje të rregullave të mbrojtjes në punë
Nga Komisariati i Policisë Korçë janë proceduar penalisht shtetasit A. H., 34 vjeç, dhe A. K., 36 vjeç, të dy me detyrë përgjegjës teknik në një fabrikë këpucësh, pasi gjatë punës është dëmtuar një punonjëse. Ajo mori ndihmën mjekësore dhe ndodhet jashtë rrezikut për jetën.
Lojëra fati të paligjshme
Në vijim të hetimeve për rastin e lojërave të fatit të evidentuar më 9 nëntor, policia ka kapur shtetasin L. M., 26 vjeç, banues në Korçë, i cili ishte shpallur në kërkim si bashkëpunëtor i të arrestuarit E. J. Materialet procedurale u referuan në Prokurori për veprime të mëtejshme.
Dy raste humbjeje jete
Më datë 10 nëntor, në Korçë, K. E., 53 vjeç, humbi jetën në banesë, ku dyshohet për shkaqe natyrale.
Ndërsa më 11 nëntor, në Maliq, është gjetur i pajetë në rrugë shtetasi E. Ç., 49 vjeç. Nga këqyrja paraprake nuk janë konstatuar shenja dhune, ndërkohë që po punohet për përcaktimin e shkakut të vdekjes.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme hetimore.
