Policia e Korçës ka raportuar disa arrestime dhe procedime penale gjatë 24 orëve të fundit në qytete të ndryshme të qarkut.
Në Pogradec, shërbimet e Komisariatit të Policisë ndaluan shtetasin D. Ç., 37 vjeç, banues në fshatin Buçimas, i dënuar nga Gjykata e Apelit Tiranë me 6 muaj burg për “Drejtim automjeti në mënyrë të parregullt”. Po ashtu, specialistët e Sektorit të Qarkullimit Rrugor arrestuan në flagrancë shtetasit A. L., 40 vjeç dhe R. O., 33 vjeç, të dy banues në Pogradec, pasi u kapën duke drejtuar automjetet në gjendje të dehur.
Në Devoll, nisi procedimi penal për shtetasin E. D., i kapur duke kryer punime ndërtimi pa leje, ndërsa në Korçë, shtetasi Xh. K., 40 vjeç, nga Boboshtica, u procedua penalisht pasi u kap duke prerë në mënyrë të dyshuar të paligjshme një sasi lënde drusore.
Ndërkohë, më 13 gusht, në fshatin Drenovë, shtetasi J. J., 73 vjeç, kallëzoi se i janë vjedhur disa orendi shtëpiake në banesë, ndërsa në fshatin Rëmbec, 58-vjeçari J. A. u paraqit në spital me lëndime në kokë, pasi dyshohet se u godit nga një kafshë samari (kalë). Ai ndodhet nën kujdesin e mjekëve.
Policia po vijon hetimet dhe procedurat për secilin rast, në bashkëpunim me Prokurorinë pranë Gjykatës së Shkallës së Parë Korçë.
