Policia e Korçës ka vënë në pranga një 25-vjeçar, pasi pagoi furnizimin e automjetit me një kartëmonedhë të falsifikuar. Ngjarja u denoncua nga punonjësi i një pike karburanti, duke çuar në nisjen e hetimeve nga Specialistët për Krimet Ekonomike dhe Financiare.
Si rezultat, u identifikua dhe u arrestua shtetasi K. B., 25 vjeç, banues në Korçë. Gjatë kontrollit fizik dhe atij në banesë, policia gjeti e sekuestroi disa kartëmonedha të dyshuara të falsifikuara, si dhe 4 pasaporta të tij, të cilat i kishte deklaruar më herët si të humbura.
Materialet procedurale janë referuar në Prokurorinë e Korçës, ndërsa i riu do të hetohet për veprat penale “Falsifikimi i monedhave” dhe “Falsifikimi i vulave, stampave apo i formularëve”.
