Një operacion i koduar “Again”, i zhvilluar nga Policia e Korçës, ka përfunduar me arrestimin e 26-vjeçarit Renato Lipe, person me precedent penal për armëmbajtje pa leje, i cili u kap me armë zjarri në banesë dhe kërcënoi me jetë punonjësit e rendit.
Operacioni u organizua nga Komisariati i Policisë Korçë, në bashkëpunim me shërbimet operacionale të Drejtorisë Vendore, pasi u siguruan informacione se Lipe mbante sërish armë. Në momentin e ndërhyrjes, i riu refuzoi të hapte derën dhe deklaroi se do të qëllonte drejt policisë. Për shkak të rrezikshmërisë së situatës, në aksion morën pjesë edhe nëndrejtori i Drejtorisë Vendore të Policisë Korçë, Hajri Kushe, si dhe shefi i Komisariatit të Korçës.
Pas thirrjeve të përsëritura dhe ndërhyrjes profesionale, 26-vjeçari u neutralizua dhe u arrestua në flagrancë. Në cilësinë e provës materiale u sekuestrua arma e zjarrit tip pistoletë, me fishek në fole gati për qitje, si dhe municion luftarak.
Materialet procedurale i janë referuar Prokurorisë së Korçës, ku pritet që Lipe të përballet me akuza të rënda për armëmbajtje pa leje dhe kërcënim ndaj punonjësve të Policisë.
