Korça renditet si një ndër qarqet më të mëdha sa i përket prodhimeve bujqësore. Por edhe pse e tillë, fermerët nuk arrijnë të vjelin të ardhura të mjaftueshme që të mbajnë dhe shtojnë fermat e tyre, madje vitet e fundit nuk arrijnë as të nxjerrin shpenzimet e tyre.
Edhe pse produktet bujqësore që ato prodhojnë shiten në treg me çmime shumë herë më të larta nga sa ua blejnë tregtarët.
Kolibri.al bisedoi me dy nga fermerët më të mëdhenj të juglindjes, të cilët shprehen se si kanë situatën ekonomike. Ata tregojnë se në shumicën e rasteve malli mbetet stok dhe fakti që fermerët shesin në mënyrë informale bën që tregtarët të luajnë keqas me çmimin e për pasojë në fund ai që e pëson është fermeri, sidomos ai i vogël.
Por cila është zgjidhja që edhe fermeri të gëzojë frutet e punës dhe mundit të prodhimeve të tyre bujqësore, vetëm bashkimi i fermerëve.
Kërkesën për bashkim të fermerëve vazhdimisht e ka artikuluar edhe Agjencia Rajonale e Bujqësisë së Korçës, por diçka e tillë nuk po ndodh, ndërsa shitja e prodhimit në mënyrë informale në rrugë dhe furgona bën që çmimet t’i orientojnë tregtarët të cilët më pas i shesin prodhimet me 3 apo 4 fish fitim.
