Strukturat e Policisë së Korçës vijojnë kontrollet intensive në të gjithë territorin e qarkut, me qëllim evidentimin dhe goditjen e veprimtarive të paligjshme të lojërave të fatit. Si rezultat i informacioneve të siguruara në rrugë operative dhe kontrolleve të kryera, janë goditur dy raste të tjera, në vijim të operacionit policor të koduar “Qarku”, i zhvilluar katër ditë më parë.
Gjatë veprimeve procedurale, Policia ka zbuluar dy lokale në lagjen nr. 8 të qytetit të Korçës, ku organizoheshin lojëra fati. Në përfundim të kontrolleve:
U arrestua në flagrancë shtetasi L. Dh., 32 vjeç, pronar i një prej lokaleve, për veprat penale “Organizimi ose ushtrimi i veprimtarive të lojërave të fatit”, “Vënia në dispozicion e lokaleve për lojëra fati” dhe “Punësimi i paligjshëm”.
Nisi procedimi në gjendje të lirë për shtetasin M. S., 26 vjeç, i punësuar në mënyrë të paligjshme në lokalin e tij, i dyshuar për organizim të lojërave të fatit. Gjatë kontrollit të celularëve të tyre u gjetën faqe aktive bastesh sportive.
U procedua penalisht edhe shtetasi H. L., 30 vjeç, pasi në celularin e tij, në ambientet e një lokali, u konstatuan faqe aktive për baste sportive.
Në cilësinë e provës materiale u sekuestruan 3 celularë.
Materialet procedurale i janë referuar Prokurorisë së Korçës për veprime të mëtejshme.
DVP Korçë deklaron se kontrollet do të vijojnë pa ndërprerje, me synim parandalimin dhe goditjen e aktiviteteve të paligjshme që dëmtojnë rendin dhe sigurinë publike.
