Një tjetër rast i ushtrimit të paligjshëm të lojërave të fatit është goditur në qytetin e Korçës, si rezultat i operacionit policor të koduar “Slot Machine”, zhvilluar nga Specialistët e Krimeve Ekonomiko-Financiare në bashkëpunim me Forcën e Posaçme “Shqiponja”.
Hetimet u zhvilluan në bazë të informacioneve të siguruara në rrugë operative dhe ankesave të qytetarëve, të shqetësuar për ushtrimin e kësaj veprimtarie në zona të banuara. Operacioni çoi në zbulimin e një lokali që ishte përshtatur për zhvillimin e lojërave të fatit me makinete, në kundërshtim të plotë me ligjin.
Në përfundim të kontrollit u arrestuan në flagrancë dy persona: një 53-vjeçar që kishte lëshuar me qira lokalin dhe një 34-vjeçar i punësuar në të njëjtin ambient. Ndërkohë, është shpallur në kërkim një 50-vjeçar, i dyshuar si organizatori kryesor i aktivitetit të paligjshëm dhe posedues i makinetave, i cili akuzohet për një sërë veprash penale, përfshirë fshehjen e të ardhurave dhe mospagimin e taksave.
Gjatë operacionit u sekuestruan si prova materiale 10 makineta të lojërave të fatit dhe 3 telefona celularë. Të gjithë materialet procedurale iu referuan Prokurorisë për veprime të mëtejshme.
