Mbyllet në Korçë festivali ndërkombëtar i filmit me metrazh të shkurtër
Fituesi i këtij festivali është filmi francez Bellus i autorit Alexis Pazoumian. Netët e këtij festivali janë ndjekur nga një numër i konsiderueshëm artdashësish korçare madje e turistë të huaj të cilët kanë kaluar pushimet në qytetin më të madh të juglindjes së vendit.
Drejtori i Festivalit Gledis Bica ka bërë me dije se krejt ndryshe nga festivali i një viti më parë në Korçë, këtë vit ndoshta e për shkak se filmat janë shfaqur në kinema, ka tërhequr më shumë vëmendje, duke qenë kështu një mundësi e mirë promovimi edhe për qytetin e Korçës për vendet pjesëmarrëse në këtë festival.
Kryetari i jurisë, maqedonasi Islia Piperkoski është shprehur se filmat me metrazh të shkurtër janë e ardhmja e kinematografise për shkak dhe të kohës në të cilët sot jetojmë. Ai ka vlerësuar numrin e lartë të filmave pjesëmarrës e ndihet entuziast për të ardhmen.
“Filmat ishin shumë cilësorë, mu bë qejfi që pashë aq shumë filma në konkurrim. Mendoj se e ardhmja e kinematografisë botërore është filmi me metrazh të shkurtër deri sa dhe koha moderne e kërkon këtë. Filmat ishin të gjithë shumë të mirë por kishte disa që përtej cilësisë përcillnin dhe mesazhe të forta ndaj e kishin kuptuar se filmi nuk duhet të ketë vetëm pamje të mirë por dhe kuptim, e regjisorët ishin përkushtuar shumë për të dhënë botës disa filma që do të ngelen gjatë në memorien time e të tjerëve ”
Gjatë 5 netëve të festivalit ndërkombëtar të filmit me metrazh të shkurtër janë shfaqur 41 filma, 5 prej të cilëve ka qenë prodhime gjermane, filma të cilat nuk ishin përfshirë në konkurrim ndërsa 36 të tjerë kanë konkurruar me njeri tjetrin.
Filmi më i mirë i shkurtër – Bellus | Alexis Pazoumian | Francë
Filmi më i mirë i shkurtër, gara ndërkombëtare – Radio Qetësia | Kerren Lumer-Klabbers | Danimarkë
Filmi më i mirë i shkurtër, gara kombëtare – Prishtinë, 2002 | Trëndelina Halili | Kosovë
Filmi më i mirë i shkurtër, gara studentore – Fundi tjetër i rrugës | Kálmán Nagy| Hungari, Austri
Cmimi i publikut
Richter nga Koloreto Cukali- Shqiperi
