Ka përfunduar edicioni i 11-të i Simpoziumit Ndërkombëtar “Skulptura e Parkut” në Korçë, i cili këtë vit mblodhi pesë artistë nga Austria, Sllovenia, Italia, Kosova dhe India. Për disa ditë, ata punuan në sy të publikut, duke sjellë një përvojë të rrallë krijuese dhe duke i dhuruar qytetit pesë vepra të reja që pasurojnë galerinë e hapur në natyrë.
Drejtoresha e Qendrës së Artit dhe Kulturës, Zamira Kita, e cilësoi simpoziumin si një traditë që i jep identitet kulturor Korçës:
“Ky aktivitet sjell çdo vit jo vetëm vepra të reja, por edhe frymën e bashkëpunimit ndërkombëtar. Artistët përcjellin shpirtin e tyre krijues dhe e bëjnë qytetin më të pasur në art dhe kulturë.”
Kuratori i simpoziumit, Butrint Morina, u ndal tek dimensioni i afërsisë së publikut me procesin artistik:
“Qytetarët patën mundësi të shohin nga afër lindjen e veprave, ndërsa çdo skulpturë e re e kthen Parkun Rinia në një muze të hapur, duke e bërë artin pjesë të jetës së përditshme.”
Organizuar nga Bashkia e Korçës dhe Qendra e Artit dhe Kulturës, me mbështetjen e Qendrës për Hapje dhe Dialog, simpoziumi ka sjellë ndër vite dhjetëra vepra që e kanë vendosur Korçën mes qendrave kryesore të artit bashkëkohor në Shqipëri.
