Kryetari i Bashkisë Pogradec, Ilir Xhakolli, ka zhvilluar një takim zyrtar me Konsullin e Përgjithshëm të Greqisë në Korçë, Asterios Bouzias. Qëllimi i takimit ishte forcimi i bashkëpunimit dypalësh dhe krijimi i lidhjeve të reja institucionale me qytete të ndryshme greke.
Gjatë bisedës u diskutua për zgjerimin e shkëmbimeve kulturore e turistike, si dhe për nxitjen e aktiviteteve të përbashkëta artistike mes krijuesve nga Greqia dhe Pogradeci. Një tjetër pikë e rëndësishme ishte zhvillimi i projekteve rinore dhe mundësitë për bashkëpunime të mëtejshme në këtë drejtim.
Kryebashkiaku Xhakolli e njohu konsullin me potencialin turistik, natyror dhe historik të Pogradecit, ndërsa Bouzias shprehu interes për të vizituar disa nga zonat më karakteristike të qytetit në të ardhmen e afërt.
Takimi u mbyll me diskutime mbi procesin e integrimit europian të Shqipërisë dhe mundësitë për të përthithur fonde të BE-së përmes partneriteteve me bashkitë e qyteteve greke.
Ilir Xhakolli falënderoi konsullin Bouzias për vizitën dhe vlerësimin ndaj Pogradecit, duke theksuar gatishmërinë për të thelluar edhe më tej bashkëpunimin ndërinstitucional.
