Më shumë se 50 fëmijë të grupmoshave të ndryshme paraqiten çdo ditë për të marrë shërbimin mjekësor pranë Urgjencës së Pediatrisë në Spitalin Rajonal të Korçës.
Temperaturat e larta dhe virozat e stinës së verës kanë sjellë çrregullime shëndetësore tek fëmijët. Këtë e pohon Robert Rado, shef i shërbimit të pediatrisë, ndërsa thotë se gjatë kësaj periudhe janë duke qarkulluar tre viroza stinore.
Sipas mjekut Rado, pjesa më e madhe e fëmijëve pasi vizitohen marrin trajtimin në shtëpi, ndërkohë që nuk mungojnë edhe rastet e shtrimeve në spital. Mjeku pediatër këshillon prindërit të tregojnë kujdes me ambientin ku qëndrojnë fëmijët, me higjienën e tyre, por edhe me ushqimin që konsumojnë.
Në këtë periudhë të nxehtë vere, higjiena dhe konsumimi i sa më shumë lëngjeve janë dy nga masat kryesore që mjekët u rekomandojnë prindërve, në mënyrë që fëmijët të mos preken nga virozat e stinës.
