Një vendim i pazakontë, por me mesazh të fortë, është marrë nga një lokal në qytetin e Pogradecit. Menaxheri i tij, Armand Hoxha, ka vendosur të mos lejojë më hyrjen e personave nën 18 vjeç, me synimin për të frenuar braktisjen e orëve të mësimit nga nxënësit.
“E morëm si iniciativë duke parë që nxënësit kishin tendencë të lënies së orëve të mësimit, mosfrekuntimin e shkollës. Pamë që kishin kaluar nga librat tek veshjet ekstravagante, tek duhani, fjalori banal dhe mendojmë si ‘Sherlock Irish Pub’ të japim mesazh për gjithë njerëzit e për bizneset që mos përfitojnë nga mosha e tyre e vogël. Jemi lokal afër gjimnazit.”
Ky vendim, edhe pse sjell humbje ekonomike për lokalin, për menaxherin dhe stafin ka më shumë vlerë si mesazh sensibilizues për prindërit dhe komunitetin.
“Kjo sjell peshë në financat e lokalit pasi çdo individ përkthehet në të ardhura, por ne mendojmë më mirë një lokal bosh sesa një shkollë bosh. Po bëjmë sensibilizim për pronarët e lokaleve të tjerë që janë vet prindër.” – shton menaxheri i lokalit.
Iniciativa është përshëndetur edhe nga specialistët e shëndetit mendor dhe punonjësit socialë, të cilët e cilësojnë një hap pozitiv për interesin më të lartë të fëmijëve. Arbi Basho, punonjës social thekson se:
“Nisma është pozitive për ndikimin në komunitet. Interesi më i lartë i fëmijës duhet të respektohet. Gjatë orëve mësimore fëmijët nuk duhet të devijojnë. Çdo aktivitet tjetër jashtë shkollës është deviant. Subjektet dhe komuniteti ynë në Pogradec duhet të bëjnë përpjekje që fëmijët të jenë në mësim, siç është edhe subjekti në fjalë që ndalon prezencën e të miturve gjatë orarit mësimor. Të gjithë jemi prindër, asnjë prind nuk dëshiron që fëmija i tij të qëndrojë në lokal gjatë orëve të shkollës.”
Ky shembull nga Pogradeci pritet të ngjallë diskutime edhe në qytete të tjera, për mënyrën se si bizneset mund të kontribuojnë në edukimin dhe orientimin e brezit të ri.
