Drejtoria e Monumenteve të Kulturës ka ndërhyrë në një tjetër monument të trashëgimisë fetare duke shmangur kështu shkatërrimin e objektit të kultit. Bëhet fjalë për kishën e “Shën Mërisë” në Lubonjë e cila prej vitesh lëngonte pasi çatia e saj ishte amortizuar mjaft dhe faktorët atmosferikë po e shkatërronin edhe më.
Falë kërkesave të vijueshme të banorëve të zonës të cilët janë lidhur shpirtërisht me objektin është mundësuar edhe ndërhyrja në të. Drejtoria e Monumenteve të Kulturës Rajoni Korçë-Berat njoftoi se:
- Gjatë këtij muaji kemi përfunduar punimet e mirëmbajtjes për restaurimin e çatisë në kishën e Shën Mërisë, në fshatin Lubonjë.
- Çatia shfaqte problematike në dëmtimin e konstruksionit dhe lagështisë në brendinë e kishës.
- Në këtë fazë të ndërhyrjes nga ekipi i mirëmbajtjes së DRTKK është realizuar ndërhyrja në të gjithë sipërfaqen e çatisë.
Një falenderim për komunitetin në ndjeshmërinë për trashëgiminë kulturore të zonës.
