Edicioni i 33-të i Lojërave Olimpike do të ngrejë sot siparin, me ceremoninë e hapjes në Paris, një veprimtari që do të bëjë bashkë 10500 sportistë nga e gjithë bota. 329 evente, për 32 disiplinë të ndryshme sportive me aktivitetin që do ta ulë siparin më 11 gusht.
Shqipëria në këto lojëra do të përfaqësohet nga 8 sportistë katër nga të cilët e kanë siguruar kualifikimin me normë në bazë të perfomancës sportive, ndërsa katër të tjerë shkojnë me ftesë.
Ndërsa pjesa tjetër e ekipit ka shkuar që të mërkurën në kryeqytetin francez, Luiza Gega, flamurmbajtësja e Shqipërisë në Rio dhe në Tokio, ka preferuar që të vijojë stërvitjen në vendin tonë.
Luiza Gega vijon të stërvitet prej një muaji në Dardhë të Korçës. Gara e saj është më 4 gusht dhe ka vendosur që të stërvitet në vendin tonë deri atëherë. Flamuri kuqezi do të mbahet në Paris nga notarja e talentuar 16 vjeçare, Kaltra Meca.
