Një tjetër lulishte i është shtuar qytetit të Korçës, kësaj here në lagjen 8, ku punonjësit e Ndërmarrjes së Shërbimeve Publike kanë ndërhyrë për rehabilitimin e zonës dhe kthimin e saj në një hapësirë çlodhëse për banorët.
Në këtë lulishte është kryer krasitja e pemëve, mbjellja e barit dhe bimësisë më të lartë, duke e bërë zonën më të gjelbëruar dhe të këndshme për banorët. Shtimi i sipërfaqeve të gjelbëruara ka sjellë një atmosferë më të pastër dhe të shëndetshme në lagje, duke krijuar një ambient të përshtatshëm për pushim dhe socializim.
Banorët shprehen të kënaqur me këtë ndërhyrje, pasi lulishteja tashmë shërben si një pikë e re sociale dhe rekreative në lagje. Ata vlerësojnë punën e bashkisë për përmirësimin e infrastrukturës dhe shtimin e hapësirave të gjelbra, të cilat ndikojnë pozitivisht në cilësinë e jetesës.
Kryebashkiaku Sotiraq Filo, në një status në rrjetet sociale, ka deklaruar se bashkia po punon çdo ditë për ta bërë Korçën një qytet me standarde europiane, jo vetëm në qendër, por në çdo lagje, me qëllim përmirësimin e cilësisë së jetesës për çdo banor.
Ai theksoi se projektet për rehabilitimin e lulishteve dhe hapësirave publike do të vijojnë edhe në lagje të tjera të qytetit, duke krijuar më shumë mundësi për pushim dhe argëtim për qytetarët.
