Transportuan me dy fuoristrada, lëndë drusore të prerë në mënyrë të paligjshme, vihet në pranga 1 shtetas, shpallet në kërkim vëllai i tij.
Sekuestrohen 70 m3 dru pa dokumentacionin përkatës dhe 2 automjetet që shërbyen për t’i transportuar.
Specialistët për Hetimin e Krimeve të Komisariatit të Policisë Maliq, në zbatim të planit të masave për parandalimin dhe goditjen e krimeve mjedisore, goditën një tjetër rast të prerjes së paligjshme të pyjeve. Si rezultat u arrestua në flagrancë shtetasi U. Z., 47 vjeç, si dhe u shpall në kërkim shtetasi Q. Z., 60 vjeç, banues në Maliq.
Shërbimet e Policisë, në bazë të informacioneve të siguruara nga inteligjenca informative se këta shtetas ushtronin aktivitetin e prerjes së paligjshme të pyjeve, kanë ushtruar kontroll dhe në Maliq, kanë gjetur të magazinuara 70 m³ dru zjarri, pa dokumentacionin përkatës, që këta shtetas i kishin prerë në mënyrë të paligjshme.
Nga verifikimet e kryera rezultoi se sasinë e druve, shtetasit U. Z. dhe Q. Z. e transportonin me dy automjete tip fuoristrada, njëri prej të cilëve pa targa. Sasia e druve dhe automjetet u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
Drejtoria Vendore e Policisë Korçë apelon për të gjithë qytetarët që të mos implikohen në veprimtari të kundërligjshme në dëm të mjedisit: si prerje të paligjshme të drurëve, ndërtime pa leje, marrje të kundërligjshme të inerteve, shpërdorim të tokës, ndotje të saj, të ujërave apo të ajrit, pasi kontrollet vijojnë pandërprerë edhe gjatë natës, dhe çdo tentativë do të konstatohet dhe do të goditet me forcën e ligjit.
