Policia e Korçës ka zbardhur ngjarjen e rëndë të ndodhur një ditë më parë në fshatin Pirg të Maliqit, ku një 14-vjeçar humbi jetën pasi u godit me thikë nga një bashkëmoshatar i tij, gjatë një konflikti për motive të dobëta.
Si rezultat i hetimeve të shpejta dhe profesionale, u arrestuan 8 persona:
E. G., 14 vjeç, nga fshati Leminot, autor i dyshuar i vrasjes, i cili pas krimit tentoi të largohej nga vendngjarja me automjet. Ai akuzohet për “Vrasje me dashje” dhe “Drejtim automjeti në mënyrë të parregullt”;
Babai dhe xhaxhai i tij, Edison Guri dhe Roland Guri, të akuzuar për “Veprime që pengojnë zbulimin e të vërtetës”, pasi fshehën mjetin prerës me të cilin u krye krimi;
4 të mitur nga fshati Zvirinë, të pranishëm gjatë konfliktit, të cilët dyshohet se kanë penguar hetimet me deklarimet e tyre dhe akuzohen për “Moskallëzim krimi” dhe “Veprime që pengojnë zbulimin e të vërtetës”;
Flori Çela, 34 vjeç, nga fshati Leminot, i pranishëm në vendngjarje dhe i akuzuar për “Moskallëzim krimi”.
Gjatë veprimeve hetimore janë sekuestruar thika me të cilën u krye vrasja, automjeti me të cilin tentuan të largoheshin dy prej personave dhe pesë telefona celularë.
14-vjeçari autor i dyshuar është dëmtuar lehtë gjatë konfliktit, ka marrë ndihmën mjekësore dhe është larguar nga spitali po atë ditë.
Materialet procedurale i janë referuar Prokurorisë së Korçës për veprime të mëtejshme, ndërsa hetimet vijojnë për zbardhjen e plotë të rrethanave të ngjarjes.
