Pas përfundimit me sukses të projektit fotovoltaik dhe vendosjes së paneleve diellore që sollën ndriçimin me energji të pastër të qytetit të Maliqit, Bashkia Maliq ka hedhur një tjetër hap të rëndësishëm drejt zhvillimit të qëndrueshëm – instalimin e karikuesit të parë për automjete elektrike.
Ky karikues modern, pjesë e projektit “Soleta solare”, u realizua falë financimit dhe mbështetjes së Fondit Shqiptar të Zhvillimit (FSHZH), si një risi që vjen në ndihmë të poseduesve të mjeteve elektrike në qytet dhe në zonat përreth.
Investimi synon të nxisë përdorimin e energjisë së pastër dhe të reduktojë ndotjen, duke e kthyer Maliqin në një model të transformimit të gjelbër në nivel vendor.
Ky projekt, që pason instalimin e paneleve fotovoltaike për ndriçimin e bulevardit kryesor të qytetit, konfirmon angazhimin e Bashkisë Maliq për të ndërtuar një infrastrukturë moderne, miqësore me mjedisin dhe me fokus në efikasitetin energjetik.
