Muaji tetor i është dedikuar ndërgjegjësimit për kontrollin e hershëm dhe kapjen në kohë të kancerit të gjirit. Në këtë muaj ndërmerren një sërë fushatash ndërgjegjësuese për kontrollin dhe vetëkontrollin e grave.
Kjo e hënë e 21 tetorit përkon me Ditën Kombëtare të Depistimit për Kancerin e Gjirit. Në kuadër të kësaj dite, një aktivitet sensibilizues është organizuar nga Njësia Vendore e Kujdesit Shëndetësor Korçë, ku kanë marrë pjesë gratë e vajzat e disa prej institucioneve vendore.
Ato kanë përcjellë mesazhe sensibilizuese dhe kanë bërë apel për kryerjen e kontrolleve të vazhdueshme. Ky aktivitet, ka patur si qëllim mbështetjen morale për të cilën kanë nevojë të gjitha gratë e prekura nga kjo sëmundje, si dhe për tu bërë thirrje të gjithë atyre të cilat deri më sot nuk kanë bërë një ekzaminim të gjirit, pasi kontrollet e rregullta të ekzamimit të gjirit shpëtojnë jetë.
Tetori është caktuar si muaji i ndërgjegjësimit për kancerin e gjirit në të gjithë botën, për të rritur vëmendjen dhe mbështetjen për sensibilizimin, zbulimin e hershëm, trajtimin, si dhe kujdesin paliativ të kësaj sëmundjeje.
