Një nga ish-lojtarët e Skënderbeut, i cili duhet pranuar se ka qenë ndër më të rëndësishmit kohët e fundit në ekipin korçar, mesa duket nuk do të jetë më lojtar i Bylisit të Ballshit, por do të kalojë me Strugën e Maqedonisë së Veriut.
Është pikërisht Vangjel Zguro, djali nga Mokra e Pogradecit i cili ka vendosur që karrierën e tij ta vazhdojë ta zhvillojë në Maqedoninë e Veriut, aty ku do të gjejë me dhjetra shqiptarë të tjerë në këtë ekip.
Mesa duket është Shpëtim Duro, trajneri i cili drejton Stugën, që e ka bindur pogradecarin Zguro për të luajtur me këtë ekip.
Vlen të theksohet fakti se Zguro luan në pozicionin e mbrojtësit, ndërkohë që ai mund të alternohet shumë mirë edhe në pozicionin e mesfushës, aty ku ka shënuar me dhjetra gola për Bylisin e Ballshit.
