Me një atmosferë të jashtëzakonshme energjie, bashkëpunimi dhe krijimtarie, është mbyllur me sukses kampi veror “Korça ICT Academy & Code for Albania 2025”, i cili për dy javë me radhë e shndërroi Korçën në një qendër të vërtetë të inovacionit dhe teknologjisë për të rinjtë nga e gjithë Shqipëria.
100 nxënës të përzgjedhur për pasionin dhe talentin e tyre në fushën e teknologjisë u angazhuan në mbi 80 orë trajnime praktike, punë në projekte reale dhe mentorim intensiv nga instruktorë ndërkombëtarë, përfshirë pedagogë nga Stanford University, si dhe ekspertë nga SHBA dhe Kanada.
Ky kamp, tashmë një model i suksesshëm ndërkombëtar, solli jo vetëm njohuri teknike dhe programim, por edhe frymën e bashkëpunimit dhe të sipërmarrjes për të rinjtë pjesëmarrës.
Përmbyllja e kampit u shoqërua me vlerësime të larta për organizatorët, mentorët dhe partnerët, të cilët mundësuan një eksperiencë të paharrueshme për pjesëmarrësit. “Korça ICT Academy & Code for Albania” është kthyer tashmë në një pikë referimi verore për çdo të ri që synon të ndërtojë të ardhmen në botën e teknologjisë.
“Na u bashkuat si nxënës, largoheni si pionierë të teknologjisë” – ishte mesazhi frymëzues që mbylli këtë edicion të kampit, duke përçuar misionin e tij të qartë: fuqizimin e brezit të ri përmes dijes dhe inovacionit.
