Ardit Nikaj ishte lojtari që shënoi golin e avantazhit për korçarët. Sulmuesi pati edhe një shans të madh të shënonte golin e dytë para se Tirana të barazonte. Gjithsesi, në fund lojtari foli për “Panorama Sport”.
“Të vjen keq pasi ishte një nga ato ndeshje ku kundërshtari nuk meritonte të merrte pikë dhe ne duhet të kishim fituar, por nuk kemi ditur të vrasim ndeshjen.
Nisëm mirë dhe nuk i lamë mundësi Tiranës për të zotëruar lojën. Krijuam raste të shumta dhe mund të kishim mbyllur llogaritë që në pjesën e parë. Na vjen keq, pasi ishte ndeshje që duhet ta kishim fituar”, tha ai.
Lojtari foli edhe për rastet e humbura në fushë që mund t’i kishin dhënë Skënderbeut 3 pikët.
“Në ndeshje të tilla edhe fati ka pjesën e vet. Te rasti i humbur ishte diçka shumë e shpejtë dhe nuk mendoja se ai top do të kalonte. Mëkat që edhe ajo traversë nuk shkoi në rrjetë. Sa i përket penalltisë e diskutuam me Liçon dhe Rashicën dhe vendosa ta marr unë përsipër. Jam i lumtur për golin, por duhet të kishim fituar ndeshjen, pasi ishim dominues ndaj kundërshtarit”, tha Nikaj.
