Peizazhet katërstinore të liqenit, hijëshia e malit të Thatë, barkat valëzonjëse, natyra e bukur gjithandej rreth qytetit të Pogradecit, jeta qytetare asokohe, nuk do të na vinin sot pa Misto Cicin.
Përveç natyrës në objektivin e tij janë fokusuar momente të ndryshme historike dhe kulturore të qytetit si trupa amatore e teatrit, vizita e Fan Nolit në Pogradec, momentet e pushtimit dhe çlirimit të qytetit gjatë Luftës së Dytë Botërore, si dhe shumë ngjarje dhe dëshmi fiksuar në celuloid për brezat që do të vijnë.
Me mjeshtërinë dhe talentin e Misto Cicit nuk duhet të mburret vetëm Pogradeci, pasi Mistoja qëndron përkrah emrave të artit fotografik shqiptar, si Marubët e famshëm, mjeshtri korçar Kristaq Sotiri, Kiço Venetiku, Dhimitër Vangjeli, Shan Pici etj.
