Ngjarja e rëndë e ndodhur në Korçë, ku një vajzë 14-vjeçare u hodh nga kati i tretë i pallatit ku banonte, ka tronditur opinionin publik. Mjekja psikiatre Nikolina Bode, e cila po ndjek nga afër rastin, ka dhënë detaje shqetësuese mbi gjendjen psikologjike të të miturës dhe situatën familjare që e rrethon.
“Vajza nuk ka frikë nga humbja e jetës dhe e përdor si kërcënim. Ka deklaruar se nëse përsëritet situata, do ta bëjë përsëri. Është hera e parë për të, por kemi pasur edhe më parë raste të tilla mes fëmijëve, ku shkaqet lidhen ngushtë me edukimin në familje dhe përballjen me faktorët socialë,” – tha Bode.
Sipas mjekes, arsyet familjare janë dominante, ndërsa rasti është veçanërisht i rrezikshëm për shkak të vendosmërisë së vajzës dhe mungesës së frikës apo pendesës pas ngjarjes.
“Nëna është në kontakt të afërt me fëmijët, të cilët ishin dëshmitarë të kësaj ngjarjeje. Kjo është e frikshme, sepse sjelljet e tilla kthehen në modele brenda familjes. Fëmijët e tjerë e shikojnë si diçka për t’u justifikuar dhe i japin të drejtë motrës së tyre,” – shtoi psikiatrja.
Doktoresha Bode theksoi gjithashtu rrezikun e madh të publikimit të rasteve të tilla, pasi mund të çojnë në imitim nga fëmijë të tjerë, duke e quajtur “fenomen të rrezikshëm që po përhapet përmes teknologjisë dhe rrjeteve sociale”.
Në dëshminë e saj, vajza e mitur është shprehur se “e do lagjen dhe lagjja e do atë”, por se për shkak të konflikteve të vogla me moshatarët, dhe pas njoftimit të policisë nga e ëma, ajo ka ndërmarrë veprimin ekstrem.
“Është një veprim banal, i pazgjidhur si duhet nga të rriturit,” – përfundon mjekja psikiatre Nikolina Bode, duke bërë thirrje për më shumë kujdes dhe ndërhyrje të menjëhershme psikologjike tek fëmijët e përfshirë.
