Muzeu i artit mesjetar edhe gjatë vitit 2023 ka qenë institucioni më i vizituar nga turistët vendas e të huaj.
Drejtoresha e këtij muzeu Fjoralba Prifti tha se gjatë vitit të kaluar muzeu është vizituar nga më shumë se 30 mijë turistë, një pjesë jo e vogël e tyre kanë qenë turistë vendas gje e cila nuk kishte ndodhur vitet e tjera.
Sipas saj turistët mrekullohen nga objektet e ekspozuara në këtë muze, objekte që i përkasin shekullit të XIII ndërkohë pjesa më e madhe e tyre i përket shekullit të XVI-XVIII, atëherë kur ikonografia shqiptare ka kulmin e vet.
Për të tërhequr sa më shumë turistë të huaj e vendas muzeu i artit mesjetar ka çelur gjatë sezonit turistik disa ekspozita me ikona të cilat shfaqeshin për herë të parë.
Edhe në ditët e para të këtij viti nuk kanë munguar vizitorët, një pjesë të ardhur nga qytete të ndryshme të vendit ashtu siç nuk kanë munguar e shqiptarë të cilët jetojnë jashtë.
Në muzeun e artit mesjetar në Korçë, i vetmi i këtij lloji në vendin tonë ndodhen me shume se 7200 ikona, 400 prej të cilave janë të ekspozuara për vizitorët.
