Autoritetet serbe kanë ndaluar në pikën kufitare me Hungarinë shtetasin kosovar Mentor Mustafa, një veprim që sipas avokatit Arianit Koci vjen si kundërpërgjigje ndaj hetimeve për krime lufte që po zhvillohen në Kosovë. Mustafa, 44-vjeçar nga fshati Jasenovik i Novobërdës, u ndalua mbrëmjen e kaluar rreth orës 22:30, teksa po udhëtonte me autobus nga Shtutgarti drejt Kosovës, i shoqëruar nga vëllai i tij, Fejzullahu.
Sipas avokatit Koci, autoritetet serbe e kanë arsyetuar këtë masë me pretendimin se i ndaluari kishte një letërnjoftim të dëmtuar. Megjithatë, përfaqësuesi ligjor e lidh këtë ngjarje me zhvillimet e javës së kaluar në Kalludër të Vogël të Zubin Potokut, ku u kryen gërmime nën dyshimet për gjetjen e mbetjeve mortore të 23 intelektualëve nga Mitrovica, të vrarë gjatë luftës. “Si avokat që prej vitesh merrem me raste të tilla, nuk mund të mos e vërej se sa herë që në Kosovë ka zhvillime të rëndësishme lidhur me krimet e luftës, shpesh pasojnë edhe veprime të autoriteteve serbe. Kjo krijon një perceptim se po tentohet të ndërtohet një lloj barazimi i krimeve”, ka deklaruar Koci.
Thirrja për reagim institucional dhe sfidat e ndalimeve
Duke theksuar se këto veprime po krijojnë pasiguri te qytetarët, avokati ka kërkuar një angazhim më të madh dhe të menjëhershëm nga institucionet e Kosovës për t’u ardhur në ndihmë të ndaluarve. “Koha është faktori më i rëndësishëm. Duhet të angazhohet menjëherë një avokat në Serbi, të kuptohet baza ligjore e ndalimit, të sigurohet qasja në dokumentacion dhe të përdoren të gjitha mjetet juridike që i parashikon ligji”, ka theksuar ai.
Në këtë kontekst, ai ka vlerësuar punën e ambasadorit të Kosovës në Beograd, Jetish Jasharit, por ka nënvizuar domosdoshmërinë për mbështetje shtesë ndaj tij. “Ai është një diplomat shumë i mirë, mirëpo është lënë vetëm në zyrë. Atij i duhet ndihmë. Nuk mjafton vetëm familja dhe avokati. Duhet një reagim i shpejtë dhe i koordinuar institucional”, ka shtuar Koci.
Një nga vështirësitë kryesore në raste të tilla mbetet mungesa e transparencës dhe e komunikimit në momentet e para të ndalimit. “Sfida më e madhe është se nuk ke përballë vetëm një procedurë juridike. Ke një qytetar të privuar nga liria, një familje që pret lajme dhe shpesh shumë pak informacion në orët e para”, ka shpjeguar avokati.
Presioni ndaj avokatëve dhe diplomatëve
Përvoja e ndalimeve dhe kontrolleve të rrepta nuk u ka ndodhur vetëm qytetarëve të thjeshtë, por edhe vetë përfaqësuesve ligjorë dhe diplomatikë. Koci ka ndarë një përvojë personale, duke treguar se procedurat nga pala serbe janë bërë gjithnjë e më rigoroze. “Edhe unë në disa nga hyrjet e mia të fundit në Serbi jam ndaluar për kontroll shtesë. Madje kjo ka ndodhur edhe kur kam qenë në prani të ambasadorit të Republikës së Kosovës, Jetish Jasharit, dhe duke udhëtuar me veturë diplomatike”, ka deklaruar ai.
Pavarësisht kësaj klime të tensionuar dhe shtimit të rasteve të tilla, avokati ka theksuar se angazhimi i tij mbetet një detyrim profesional dhe njerëzor. “Megjithatë, kjo situatë dhe ky presion edhe ndaj meje nuk më ka dekurajuar”, ka përfunduar Koci, duke u bërë thirrje qytetarëve të Kosovës të tregojnë kujdes të shtuar gjatë udhëtimeve nëpër territorin e Serbisë.
Foto: Euronews Albania
