Mijëra udhëtarë kanë mbetur të bllokuar në jug të Kroacisë, në drejtim të kufirit me Malin e Zi, ku fluksi i lartë i automjeteve ka krijuar një kolonë prej më shumë se 20 kilometrash. Pritjet në pikat kufitare të Debeli Brijeg dhe Konfin arrijnë deri në 10 orë, ndërsa në terren raportohet edhe për raste ekstreme ku qytetarët kanë deklaruar se kanë pritur deri në 28 orë.
Bllokimi masiv në zonën e Çilipit është shkaktuar nga një kombinim i fluksit të jashtëzakonshëm të automjeteve drejt Malit të Zi, kontrolleve të rrepta kufitare dhe kapaciteteve të kufizuara të pikave të kalimit. Ky trafik i rënduar ka paralizuar plotësisht edhe rrugët lokale, duke vështirësuar ndjeshëm lëvizjen e përditshme të banorëve të zonës.
Ndërhyrja e emergjencës dhe solidariteti i banorëve
Përballë temperaturave të larta dhe situatës kaotike, banorët e komunës së Konavles kanë treguar solidaritet duke hapur dyert e shtëpive për udhëtarët e bllokuar, për t’u ofruar ujë dhe mundësi për të përdorur tualetet. Kryetari i Komunës së Konavles, Bozho Lasiç, e ka cilësuar këtë gjendje si të papërballueshme dhe ka kërkuar ndërhyrje urgjente nga institucionet shtetërore.
Ndërkohë, autoritetet vendase kanë aktivizuar strukturat e emergjencës dhe kanë vendosur pika për furnizim me ujë të pijshëm, në përpjekje për të ndihmuar udhëtarët deri në normalizimin e plotë të qarkullimit në këtë aks ndërkombëtar.
Foto: Euronews Albania
