Prokuroria e Posaçme (SPAK) ka identifikuar një kështjellë historike në Francë me vlerë mbi 2.6 milionë euro, si pjesë e pasurive të dyshuara të biznesmenit Ermal Beqiri. Ky i fundit u arrestua më 24 korrik pas një incidenti me avion mbi zonën e kufizuar të centralit bërthamor të Penly, ndërsa ndaj tij rëndojnë akuza për përfshirje në skema të paligjshme dhe pastrim parash.
Sipas të dhënave të bëra publike nga SPAK dhe regjistrave francezë të pronësisë, prona e identifikuar është Château d’Auteuil, një rezidencë shekullore e ndodhur në komunën Berneuil-en-Bray, në departamentin Oise, rreth një orë larg Parisit. Kjo kështjellë, e ndërtuar në shekullin XVI, shtrihet në një sipërfaqe prej rreth 1.200 metrash katrorë dhe përfshin një kompleks të rrethuar nga një park i gjerë. Elementët arkitekturorë të saj, përfshirë fasadat dhe çatitë, janë të mbrojtura si monument historik nga autoritetet franceze. Dokumentet zyrtare tregojnë se prona është blerë më 30 dhjetor 2024 për shumën ekzakte prej 2.612.200 euro, vlerë që përputhet me njoftimin e prokurorisë.
Pasuritë e tjera të zbuluara në Francë dhe Shqipëri
Prokuroria e Posaçme bëri me dije se, në bashkëpunim me autoritetet franceze, janë zbuluar edhe asete të tjera që dyshohet se kanë origjinë kriminale. Në listën e pasurive në Francë përfshihen llogari bankare me vlerë mbi 2 milionë euro, dy apartamente, automjete dhe një avion turistik. Ndërkohë, në kuadër të të njëjtit hetim, SPAK ka vendosur masa sigurie dhe ka sekuestruar pasuri të tjera të biznesmenit në Shqipëri, mes të cilave prona në Tiranë, Vlorë, Golem dhe Rolling Hills, një jaht, automjete, llogari bankare dhe subjekte tregtare.
Hetimet e SPAK për dosjen e tenderave
Biznesmeni Ermal Beqiri, i cili zotëron kompaninë “Soft & Solution”, ishte shpallur në kërkim ndërkombëtar që prej dhjetorit 2025, pasi Gjykata e Posaçme kishte caktuar ndaj tij masën e sigurisë “arrest në burg”. Autoritetet shqiptare kishin kërkuar aktivizimin e procedurës së Red Notice përmes Interpolit. Ai është nën hetim nga SPAK për një dosje që lidhet me tendera publikë me vlerë mbi 1.1 milionë euro. Prokuroria dyshon se procedurat janë manipuluar përmes një skeme presioni ndaj subjekteve pjesëmarrëse në garat publike.
Ndaj të dyshuarit rëndojnë akuza për konkurrencë të paligjshme nëpërmjet dhunës, shkelje të barazisë në tendera, grup të strukturuar kriminal dhe pastrim të produkteve të veprës penale. Ky hetim lidhet drejtpërdrejt me dosjen e tenderave të AKSHI-t, ku nën hetim janë edhe ish-drejtoresha e këtij institucioni, Mirlinda Karçanaj, biznesmeni Ergys Agasi dhe persona të tjerë. Sipas organit të akuzës, ata dyshohen për vepra penale që përfshijnë korrupsionin, manipulimin e tenderave, shpërdorimin e detyrës dhe pastrimin e parave.
Foto: Politiko
