Ndryshimet klimatike po japin gjithnjë e më shumë efekte të drejtpërdrejta në sektorin e bujqësisë në vend. Rritja e temperaturave mesatare dhe pakësimi i reshjeve totale vjetore kanë ndikuar negativisht në prodhimin bujqësor, duke vështirësuar edhe më tej punën e fermerëve.
Sipas parashikimeve për fundjavën, pritet ulje e ndjeshme e temperaturave dhe reshje dëbore, çka ka shtyrë specialistët e bujqësisë të dalin me një sërë këshillash për të ndihmuar fermerët në marrjen e masave mbrojtëse për të shmangur dëmtimet në kulturat bujqësore.
Arben Hysolli, specialist në AREB, thekson se një nga zgjidhjet më efektive është përdorimi i kultivarëve që i përshtaten më mirë kushteve të reja klimatike.
“Fermerët duhet të marrin në konsideratë edhe përdorimin e resurseve gjenetike vendase, të cilat janë më të përshtatshme për klimën e rajonit dhe ofrojnë më shumë qëndrueshmëri përballë kushteve ekstreme të motit”, – thekson Hysolli.
Ekspertët i bëjnë thirrje fermerëve që të kontrollojnë serrat, të sigurojnë mbrojtjen e bimësisë dhe të përgatiten për një sezon me sfida, për shkak të motit të paparashikueshëm dhe ndikimeve të klimës në bujqësi.
