Tingëllon pak e çuditshme por është e vërtetë, në rajonin e Pogradecit shpallja e mëvetësisë është bërë 4 muaj para ngritjes së Flamurit Kombëtar në Vlorë.
Ishte 28 Korrik 1912, ditë dhe vit në të cilin trimi i Gorës Kajo Babjeni bashkë me trima të tjerë gorarë dhe mokrarë bënë të mundur ngritje e flamurit në Gurin e Kamjes. Këtë 28 Korrik, shënohet 111-vjetori i këtij akti mjaft të madh të bërë nga luftëtarët e kohës për lirinë e atdheut. Ngritja e këtij flamuri në këtë gur është mjaft e rëndësishme pasi tregonte që zona ishte çliruar nga pushtuesit dhe nëse zotëroje Gurin e Kamjes, zotëroje kontroll në të gjithë Pogradecin dhe Gorën, Mokrën e Korçën kjo pasi lartësia e këtij Guri të jep mundësinë të kontrollosh të gjitha këto territore në fushëpamje.
Në këtë kuadër ditën e sotme Bashkia e Pogradecit dhe Shoqata Gora Pogradec kanë organizuar aktivitete për të kujtuar këtë datë. Është bërë në mënyrë simbolike ngritja e flamurit në Gurin e Kamjes dhe më pas një aktivitet artistiko-kulturor i cili u mbajt në sallën e shfaqjeve në Pogradec.
Çdo gorar është krenar për këtë datë dhe sot e kësaj dite ata festojnë në forma të ndryshme. Këtë vit nuk pati festë në Gurin e Kamjes për shkak të temperaturave tepër të larta.
