Një tjetër ambasadoreje i mbaron misioni në Shqipëri. Pak ditë më parë ishte ambasadorja amerikane, Yuri Kim dhe tashmë është ajo franceze, Elisabeth Barasacq, e cila ka lajmëruar mbylljen e mandatit të saj në vendin tonë.
Ajo ka vizituar Korçën në përfundim të rrugëtimit të saj diplomatik 3-vjeçar, ndërsa ka dhënë për mediat edhe disa mesazhe për ecurinë e deritansishme të Shqipërisë në rrugën e integrimit.
“Ka akoma shumë reforma për të bëre në fusha të ndryshme, në atë të qeverisjes luftës kundër korrupsionit, krimit të organizuar. Ritmi i shkëmbimeve dhe marrëdhënieve me Bashkimin Europian dhe Shqipërinë është një ritëm që përcaktohet vetëm nga Shqipëria”,- tha diplomatja franceze.
Po ashtu, ajo u shpreh se gjatë këtij 3 vjeçari marrëdhëniet midis dy vendeve janë zhvilluar shumë, por do dëshironte të bënte më tepër pasi në vitin e parë të mandatit të saj ishte vit pandemie.
Kryediplomatia franceze në largim ka zhviluar gjatë ditës së sotme një takim me kryebashkiakun e Korçës, Sotiraq Filo, ku u fol edhe për thellimin e bashkëpunimeve , kryesisht në fushën e kulturës.
“Në përfundim të misionit të saj në Shqipëri Ambasadorja e Francës Elisabeth Barsacq vizitoi Korçën. Në pritjen zyrtare në bashki diskutuam për vazhdimin e bashkëpunimeve të nisura, binjakëzimin e Korçës me qytetin Chambery në Francë si edhe thellimin e bashkëpunimeve kryesisht në fushën e Kulturës”, shkruan Filo në facebook.
Një ditë më parë, në kuadër të Festës së Muzikës dhe Javës së Kulturës Ndërkombëtare Ambasada e Francës në Shqipëri në bashkëpunim me Aleancën Franceze në Korçë dhe Radio Televizionin Shqiptar dhuruan emocione të bukura, përmes një koncerti veprat e kompozitorëve më të njohur francezë mes dirigjimit të maestro Aurelien Azan Zielinski dhe violinistes franceze Anna Göckel.
