Një ngjarje e rëndë ka tronditur ditën e sotme zonën e Maliqit, ku një 14-vjeçar ka humbur jetën si pasojë e goditjeve me thikë të marra nga një bashkëmoshatar.
Sipas Policisë, dy adoleshentët kishin pasur më herët konflikte mes tyre, ndërsa përplasjet kishin vijuar edhe në rrjetet sociale. Pasditen e sotme, ata janë takuar në ambientet e jashtme të një lokali në fshatin Pirg, për të sqaruar mosmarrëveshjet.
Takimi ka degjeneruar në debat të ashpër dhe më pas në përleshje fizike. Gjatë konfrontimit, autori ka përdorur thikën, duke i shkaktuar viktimës plagë të rënda, të cilat i kanë marrë jetën.
Autori, i cili ka marrë disa dëmtime, por jo nga thika, ndodhet në spital nën kujdesin e mjekëve dhe po merret në pyetje nga policia. Hetimet vijojnë për zbardhjen e plotë të rrethanave të kësaj ngjarjeje tragjike.
