Policia e qarkut Korçë ka bërë të ditur një sërë ngjarjesh dhe procedimesh penale të ndodhura ditët e fundit.
Në Pikën Kufitare të Kapshticës u kap 32-vjeçari A. Sh., nga Pogradeci, i shpallur në kërkim më 25 shtator për akuzën “Shtrëngimi me anë të kanosjes ose dhunës për dhënie pasurie”. Ndërkohë, u proceduan penalisht A. K., 54 vjeç nga Pogradeci, dhe G. D., 38 vjeç nga Hasi, të akuzuar për “Kalimi të paligjshëm të kufirit shtetëror”.
Një tjetër rast u regjistrua në Korçë, ku 37-vjeçari J. S. u procedua për dhunë ndaj një 14-vjeçari, ndërsa në Maliq, 25-vjeçari K. P. u kallëzua për dëmtimin e një sipërfaqeje të mbjellë me bimë të një 63-vjeçari.
Gjithashtu, policia kapi O. A., 34 vjeç, i shpallur në kërkim për veprën penale “Plagosja e lehtë me dashje”, i cili tashmë do të hetohet në gjendje të lirë.
Një ngjarje e veçantë ndodhi në fshatin Vashtmi të Maliqit, ku për shkak të një defekti teknik, një automjet në lëvizje që drejtohej nga një 27-vjeçare mori flakë dhe u dogj pjesërisht. Fatmirësisht, nuk pati të lënduar.
Të gjitha materialet iu referuan Prokurorisë së Korçës për veprime të mëtejshme.
