Pas vendimit të Gjykatës së Korçës për pezullimin e dënimit me burg ndaj Dritson Kurtit, ka ardhur edhe një reagim nga deputeti i qarkut Korçë, Niko Peleshi. Përmes një statusi në rrjetet sociale, Peleshi përshëndeti vendimin e gjykatës si të drejtë dhe të duhur, duke theksuar rëndësinë e ribashkimit të të riut me familjen e tij.
“Përshëndes vendimin e drejtë dhe të duhur të Gjykatës së Korçës për pezullimin e dënimit me burg ndaj Dritson Kurtit, duke mundësuar ribashkimin me familjen,” u shpreh ai në reagimin e tij.
Megjithatë, deputeti theksoi se ky rast shërben si një kujtesë se drejtësia penale nuk mjafton në vetvete, por duhet të shoqërohet me një proces të thellë emancipimi shoqëror. Ai vuri në dukje se martesa të tilla në moshë të mitur, pavarësisht justifikimeve tradicionale ose kulturore brenda komuniteteve, nuk mund të trajtohen më si çështje private.
“Traditat që përfshijnë martesat në moshë të mitur, qofshin të trashëguara apo të normalizuara brenda komuniteteve, nuk mund të trajtohen më si çështje private apo ‘kulture’. Ato janë, dhe duhet të mbeten, çështje dhe detyrë e gjithë shoqërisë për t’u adresuar me politika afatgjata,” theksoi Peleshi.
Në fund të mesazhit të tij, ai përcolli urimet më të mira për fëmijën dhe familjen, duke shprehur shpresën për një të ardhme më të sigurt dhe të barabartë për të gjithë qytetarët.
